السلام عليكم ورحمة الله وبركاته
مساكم / صبحكم الله بالخير
اليوم ودي اتكلم عن النجاح والتفوق وكيف الانسان يتخطى كل ظروفه المحيطه فيه سواء كانت ظروف دراسه أو ظروف عائليه أو .. أو .. الخ
كلنا تمر فينا ظروف في البيت .. احيان يصير عندنا تبدل فالمشاعر وخلاص ماودنا نذاكر واحيان الظغوط العائليه تشتت العقل وكل مامسكت كتاب يضيق صدرك وتقفله ..
واحيان تحس الدنيا ضايقة بك وتقول متى اتخرج وطفشت ..
اول شي / اللحين انت استسلمت للظروف وخليتها تقلل من طموحك وعزيمتك ..
وهذا الشي غلط لان لو خلينا الظروف تسيطر علينا راح نخفق وراح تصير حياتنا نكد في نكد
مو بس في الدراسه في حياتنا العاديه ..
الناس يختلفون فيه اللي يحب يفضفض لاعز اصحابه عشان يرتاح وفيه الكتوم اللي يخلي همومه في قلبه والأخير اكثر تعب من الاول لانه حابس في نفسه هموم ومجرد ماتتكاثر راح تتدمر حياته ..
انا احب اقول لو صار عندكم هموم ومالقيتوا الشخص اللي ترتاحون له فيه شي عظيم مرررره
وراح يريحكم ..
وهالشي والله من تجربه شخصيه ..
تدرون وش هالشي !!
تقوم تتوضا وتصلي ركعتين لله .. والله والله ان الراحه تحسها تطفي حرقة قلبك ومشاكلك والهموم اللي مكدره عليك حياتك ..
طبعاً انا بقول لكم شي الكثير نفسه يسوي هالشي لكن يتثاقلها يقول يوه مثلاً مشوار اقوم اصلي بعد شوي ولا يقول مالي خلق ..
هذا كله من الشيطان هو اللي يوسوس لك ويخرب عليك ..
لكن انت لاتفكر فيه وعلى طول توضى وصل ركعتين واخشع فيها بكل ماتقدر وادع فيها ربك في سجودك .. والله من تجربه شخصيه تحس برااااحه وسعااااده ..
وقلتها قبل في موضوع سابق واقولها اللحين :
لاتلجأ للعباد الجأ لرب العباد ..
وصدقوني هالشي مره مفيد وراح تحسون بطعم الراحه ..
ثانياً : اللي مايلقى الشخص اللي يرتاح له انصحه يمسك ورقه وقلم ويكتب همومه لاتكتبها بيدك اكتبها بقلبك .. خل كل شي بقلبك يطلع ..
وبأذن الله هالشي بعد مريح ..
احبابي ادري نفسنا نكون دكاتره ونفسنا نرفع راس اهالينا فوق ونفسنا ونفسنا ..
لكن لازم نتعب عشان نرتاح .. وهذي هي الحياة .. مافي شي يجي بسهوله
ومعروف اللي يجي بسهوله يروح بسهوله ..
اهم شي اذا احد مر بظرف لايستسلم له ويخليه يتملك حياته يقاومه بكل مافيه ويدعي ربه وبأذن الله كل شي بيتسهل ..
فيه عباره دايماً ارددها حتى احطها دائماً في جوالي وحتى في ماسنجري وفي اي مكان اللي هي/
الحيــاة حلوة .. ومافي شي يستحق الزعل ..
اي والله حلوة اذا احنا لجأنا لله وتوكلنا عليه كل شي بيتسهل ..
ياكثر اللي اخفقوا في دراستهم وفي امورهم الثانيه ..
اسألوهم وش السبب .. بيقول صعب أو أو .. بيقوم يختلق الاعذار ..
لكن اسأله هل لجأت لربك وقت الشده .. اذا قال ايه فهذا الشي بأذن الله خيره والمفروض مانندم على شي ربنا كاتبه لكن اللي ماعمل بالاسباب هذا اللي نعاتبه ..
هو انسان عنده طموح اكيد لكنه استهتر .. لو لقى اللي يرشده ويوجهه ويعطيه الدافع المعنوي ويوفق دايم بجنبه صدقوني راح يبدع وينتج .. والله ياناس مافيه شي صعب لكن احنا اللي نصعب الامور باستهتارنا وتأجيلنا للاشياء ..
لاتتوقعوا كاتب الموضوع دايم مبسوط وفرحان وحياته فله ووناسه ..
الحمدلله على كل شي لكن لازم الواحد يمر بظروف لكن انا عرفت كيف اتغلب عليها ..
وابيكم كلكم زيي .. ماابي احد يستسلم ويقول خلاص كل شي انتهى أو دراستي صعبه أو أو ..
لا يقول انا قدها ان شاء الله وراح اتفوق وراح اخذ المسأله تحدي وراح اثبت نفسي اني الكسبان والاقوى في هذي المسأله ..
حبايبي ..
اللي اخفق فينا وحمل مواد لايقول اخوياي كلهم عدوا وراحوا وانا لسا ماتحركت ..
يقول الله يوفقهم يارب ويسهل لهم وانا جايهم جايهم وبأذن الله مراح شي يوقفني ..
يشد حيله بالمواد اللي حملها ويتفوق فيها واهم شي لايندم على الماضي لان الندم عل شي فات ماينفع .. يقول الحمدلله على كل شي صار واللحين انا ان شاء الله راح اتغلب على نفسي وراح انجح بكل شي لاني انا انسان ناجح وعندي طموح وطموحي مراح يوقف ابد مهما صار ..
في الأخير اسأل الله ان يوفقكم جميعاً وان يسهل لكم اموركم وان يكتب لنا مافيه الخير ..
واتمنى ان الكل يكونوا متفائلين وطموحهم بأذن الله مايوقف مهما صارت الظروف ..
لاتنسون الدعاء لله والجأوا له في الرخاء يعرفكم في الشده ..
اي شي تبونه قولوا لي أي شي تحتاجونه ترى انا والله وجودي بالمنتدى لخدمتكم
تدرون اني احس بالراحه اذا جيت اكتب موضوع .. تدرون كيف طريقتي لكتابة اي موضوع ..
الطريقه والله انا افتح موضوع جديد والكلام يطلع معي بشكل تلقائي يعلم الله ان ماكان في بالي شي ..
بس مجرد ماافتح الصفحه اخلي قلبي اللي يكتب لكم ويدي اللي تنقل ..
ارجع واقول الله يوفقكم ويسهل لكم وينور دروبكم ويرضى عليكم في الدنيا والاخره
هذا والله اعلم وصلى الله على نبينا محمد وعلى اله وصحبه اجمعين ..
